NJILLOYII-MI REWO AFTUUT

Abuu Mborom Gelaajo - Aftuut 1990

Njillu am e gure jeeri

ƴeeŋ-mi ndarii-mi cooynii-mi

Paw-mi newe am niwnii-mi

Rewo yoo worgo njeeƴii-mi

Kono dara gite am leƴƴaaki

Lilluɗe ndiwri peltaani

Colon e pooli cirkaani

Lappi na’i ne momtiima

Laabi mbolon ƴoogooɓe

Maaytii ngontii jooloɓɓe

Maa tan genaale e jonki

Keletine lehon e ceekeeli

ŋolotin ƴiyon e ngubbuuji

Nguumon e cilon njani mbooƴi

Tulon jiimde gentuuji

Nyaarwon kelew e purtooje

Beeli ciliw e ŋaakooje

Cayɗe leewodii e baawe

Njurum yillitii ɓernde

E tooganel am ruumaano

Sahtu ɓiram beetooji

Tiggal piɓle kumotooɗi

Borgo hudum e hudduuji

Ɓoggol ɓiroowo nde daasi

Maaɗol worooɗe nde weeɓti

Hawgu turii e nguru mettii

Takko horo e osoyooji

Mbayla ɓuji e mbatmaaji

Daba e tiifre riginyaaji

Siido ga’i e garbaaji

Njaron kuufi kocceeje

Karon nokku bahe damɗi

Tufle hawal e rasaŋeeji

Lammbol humii njaaɓordi

Mbalka tuɗii pulkooji

Sagata e koloƴ woocii ɗi

Ticcii dunyooji e joorɗi

Mbakkoor gasii waŋi loori

Bokkol tekki ndaŋa yuumti

Cilol juuti njaaɓdaandi

ƴonngo duusi gallaaɗi

Lappol darii gori ndunnji

Diwre saawo nyallooji

Kibbitoo e dille kuunoori

Ɓernde am durii e ko waɗi yawti

Kaari Maanel fusii wiidooji

Eggi ngonti mooliiɓe

E cuuron huɗo e fermeeji

Suusɓe kawi e njogitaaje

Hulɓe ndogani laamaade

Hanki yiran yahdiiɓe

To gure e wuraa duumaale

To kantoŋel am ceeɗ-seedle

Calti gese e higguuji

Beetal kawle cumu ŋabbi

Nde Faatuma hesata huɗo perdi

Aali suurkinii kolla

Cabale so mbifii ndiiriiri

Lummba ndura e sera gorgi

Takkusaan les naange

Daƴƴe mbewii huɗo fiilni

Nyaale porli kibbitiiɗi

Dikki njowiima e jofngo

Larogal jony oo paddiiɗo

Heɗo e caafe jibtinɗi

Toɓɓon pilam dow enɗi

Ɓuranaani-mi wuurde sadakeeji.

[ Duƴƴorde ] [ - Yannande beelel gawduule ] [ - Njillu Aftuut ] [ - Ay Haame am e ndii leydi ]

Hakkeeji kala wonande DDD (Dental Doole Demokaraasi) © 2005

So won naamne walla wasiyaaji njogi-ɗon, njokkondiree e infos@ufpweb.org